تواصل نيوز - ردت سارة وفيق مخرجة فيلم ريستارت على الناقد الفني طارق الشناوي بعد انتقاده فيلم ريستارت ووصفه بأنه “فاضي ومفيهوش موضوع”، وهو ما جعلها ترد عليه ووضح في منشورها الذي شاركته شعور الغضب الذي سيطر عليها من تصريحات الأول عن الفيلم.

مخرجة فيلم ريستارت ترد على طارق الشناوي: عرفت تبقى تريند من غير نقد الفيلم

نشرت سارة وفيق منشور عبر حسابها الرسمي على موقع التواصل الاجتماعي فيسبوك ردت من خلاله على طارق الشناوي قائلة: "أستاذ طارق الشناوي في فرق كبير بين الإهانة وبين النقد.. حضرتك بتقول إن مفيش موضوع في الفيلم ودي حاجه ضحكتني جدًا لأن احنا بنتكلم عن موضوع الساعة موضوع العصر اكبر موضوع بيهمنا ويخصنا حاليا  
كلامك فكرني بمشهد في الفيلم للفنان محمد ثروت وهوه بيقول انا أعمل اي حاجه عشان ابقي تريند ( احنا خدامين التريند ) وسمع كلام الچوكر ( الفنان باسم سمره ) اللي بيشتغل لاغراض ناس ،،، مبروك يا استاذ طارق عرفت تبقي تريند من غير ما تنقد الفيلم .. تخبط في القائمين علي العمل بعيد عن العمل نفسه ولا اتكلمت عن إيجابياته ولا سلبياته، لا ههاجم اشخاص وبكده هطلع تريند بسرعه ده موضوع الفيلم اللي انت مافهمتوش أصلا ولا هو جالك ع الجرح ؟؟ و على فكره انا كمان بعرف اعمل تريند و هنطلع تريند انا وانت، بس أنا على حق وهمنشنك عشان تظهر بسرعة"

سارة وفيق لطارق الشناوي: شوف الفيلم وبعدين انتقد وبلاش سطحية

وتابعت مخرجة فيلم ريستارت حديثها الذي يرصده موقع تحيا مصر: “انت بتقول إن أغنية المقص عجبتك بس هي مش داخل الفيلم لا يا أستاذ طارق الأغنية في الفيلم بس شكل اللي بيمليك اتلخبط ، ادخل شوف الفيلم اللي انت مشوفتوش و احكم عليه بنفسك وبلاش الأفكار السطحيه اللي بتقولها علي كل الأفلام لانك لو شوفت ريستارت فعلاً كنت هتعرف ان قصته اهم ما فيه، و بعدين حضرتك بتتكلم عن أدوات المخرج والمؤلف ولم تستخدم أدواتك كناقد فني ياريتك قولت حاجه نستفيد بيها بدال مانت طالع ترمي افيهات و افيهات وحشه كمان، الرقم  اللي متحقق جوه مصر و برا مش مجامله يا استاذ طارق ده الجمهور الحقيقي اللي بنخاطبه دول مش ولاد اختي مثلاً”.

إيرادات فيلم ريستارت لـ تامر حسني 

اختتمت المخرجة سارة وفيق حديثها كاشفة عن إيرادات فيلم ريستارت لتامر حسني مؤكدة أنها تخطت 50 مليون جنيه في مصر فقط وذلك بعد أيام قليلة من طرحه في السينمات، حيث قالت: “الفيلم لسه نازل وداخل علي خمسين مليون داخل مصر فقط ودا نجاح مفرح كل صناعه الحمدلله، على العموم دي كلمتك ورأيك و الجمهور قال كلمته برضو”.

وفيلم ريستارت يشارك في بطولته تامر حسني، هنا الزاهد، باسم سمرة، محمد ثروت، عصام السقا وغيرهم والفيلم من إخراج سارة وفيق وتأليف أيمن بهجت قمر وتناول مشاكل السوشيال ميديا وسلبياتها في المجتمع.